पर्यटकलाई लोला हान्नेविरुद्ध प्रहरीको निगरानी

चैत्र, काठमाडौं । नेपाल घुम्न आएका बाह्य पर्यटकहरूलाई फागु पर्वमा जथाभावी लोला हान्ने र दुर्व्यवहार गर्नेहरूमाथि पर्यटक प्रहरीले विशेष निगरानी राख्ने भएको छ ।

सरकारले नेपाल पर्यटन वर्ष २०११ मनाइरहँदा पर्यटकहरूमाझ नकारात्मक सन्देश नजाओस् भन्ने उद्देश्यले काठमाडौंका प्रमुख स्थानहरूमा पर्यटक प्रहरीले निगरानी राख्न लागेको हो ।

दस लाख पर्यटकलाई नेपाल भित्र्याउने लक्ष्यसहित शुभारम्भ भएको पर्यटन वर्षमा नेपाल आउने पर्यटकहरूको सङ्ख्यालाई ध्यानमा राख्दै पर्यटक प्रहरी होलीमा २४ घण्टा नै तैनाथ हुने छ ।

पर्यटन तथा नागरिक उड्डयन मन्त्रालय पर्यटन उद्योग महाशाखाका सहसचिव लक्ष्मण भट्टराईले होलीमा पर्यटकहरूको सुरक्षाको लागि प्रहरीलाई विशेष रूपले परिचालन गरिने बताउनुभयो । सहसचिव भट्टराईले वर्तमान परिस्थितिमा पर्यटकहरूलाई सुरक्षाको प्रत्याभूति दिलाउन जरुरी भएकोले पर्यटक प्रहरी परिचालनसम्बन्धी विस्तृत योजना भने शुक्रबार तय हुने उहाँले जानकारी दिनुभयो ।

पर्यटन उद्योग महाशाखाअन्तर्गत पर्यटक प्रहरी शाखाका प्रहरी निरीक्षक भरत लामाले आफूहरू स्रोत र साधनले भ्याएसम्म काठमाडौंका प्रमुख स्थानहरूमा पर्यटकको सुरक्षाको लागि तैनाथ हुने बताउनुभयो ।

पर्यटकहरूको चाप बढी हुने काठमाडौंको ठमेल, वसन्तपुर, पशुपति, त्रिभुवन अन्तर्राष्ट्रिय विमानस्थल लगायतका क्षेत्रहरूमा २४ घण्टा नै पर्यटक प्रहरी खटिने उहाँले भन्नुभयो ।